ФАРЗОНАИ ХУРШЕД: «МАН БА САҲНА БАРМЕГАРДАМ» (+ Видео)

Фарзонаи Хуршед

Фарзонаи Хуршед, овозхони пуртарафдори тоҷик бо берун омадан аз дарвозаи зиндони занонаи шаҳри Норак заминро бӯса намуда, гуфт ба пасаш назар нахоҳад кард, ки мабодо боз ба қафас барнагардад.

Ӯ барои ин рӯз омодагии махсус дида, куртаи сиёҳ ва рӯймоли сафедашро (либоси махсуси занони маҳбус), ки тӯли якуним соли ахир дар бараш буд, ба куртаи зебои идонаи сурхи пурнақш иваз намуд. Ӯ мегӯяд ҳарчанд дар зиндон бо шароити хуби буду бош таъмин буд ва дар ин муддат ҳунарҳои зиёдеро аз бар кард, вале ҳамеша дар ёди озодӣ ва модараш, овозхони саршиноси тоҷик Сураё Қосимова месӯхту эҳсосашро дар шакли тарона рӯйи қоғаз меовард.

Аммо ӯ ин таронаҳоро замзама намекард, зеро ба гуфтаи худаш, барои берун омадани садояш, ҳамон ғаму андӯҳе, ки дар дилаш буд, монеъа эҷод мекард. Вале ҳеҷ гоҳ ёди саҳнаву мухлисонаш ӯро тарк намекард.

Фарзонаи Хуршед

— Ҳатман ба саҳна бармегардам ва дар консерти нахустинам матнҳоеро, ки дар зиндон эҷод шудаанд, ба риштаи оҳанг даровардаву хоҳам хонд. Ин танҳо кори вақт аст. Аммо аввалин коре, ки мекунам, аз модари азизам бахшиш мепурсам»,- афзуд Фарзонаи Хуршед.

Билохира лаҳзаҳои нафаси озод кашидан берун аз панҷараҳои маҳбас, рӯзи 23-юми август барояш даррасид. Ӯ ашк мерехт, ашки шодӣ…

Ӯро дар беруни зиндон хоҳари бузургаш, ситораи мусиқии муосири тоҷик Шабнами Сураё интизор буд. Чунин ба назар мерасид, ки дар баробари Фарзона ӯ низ хеле ҳаяҷонзада буд. Ӯ танҳо ба раисҷумҳур барои авфи маҳбусон дар пешорӯйи 20-умин солгарди истиқлолияти кишвар изҳори сипос кард ва баробари берун омадани Фарзона ба шаҳри Кӯлоб раҳсипор шуданд.

Фарзонаи Хуршед

Дар баробари Фарзона 112 нафар маҳбусон аз маҳбаси занонаи шаҳри Норак ба озодӣ баромаданд. Дар ин миён 12 нафарашро шаҳрвандони хориҷӣ аз кишварҳои Русия, Украина, Латвияву Узбакистон ташкил медоданд.

Боиси зикр аст, ки дар баробари модарони худ, панҷ тифл низ ба озодӣ баромаданд, ки дар ин муассисаи ислоҳӣ ба дунё омадаанд. Яке аз онҳо Меҳроҷиддини яксола буд, ки модараш бо ҷурми қочоқи маводи мухаддир ба 8 соли зиндон маҳкум шуда буд.

Ҳарчанд қариб ҳамаи ин занону духтарон мегӯянд, ки хоҳиши дигарбора ба зиндон баргаштанро надоранд, аммо таҷрибаҳо нишон медиҳанд, ки маҳбусони қаблан ба озодӣ баромада бо такрори ҷиноят аз нав аз озодӣ маҳрум мешаванд.

Фарзонаи Хуршед

Барои аввалин бор ба маҳбусони озодшуда Сарраёсати иҷрои ҷазои ҷиноятии Вазорати адлияи Ҷумхурии Тоҷикистон халтаҳои махсусеро ҳадя кард, ки дар он лавозимоти зарурии беҳдорӣ ва аз ҳама муҳим маълумотномаҳои ташкилоту марказҳое мавҷуд буд, ки барои мутобиқ шудан ба зиндагии пас аз маҳбас кӯмак мерасонанд.

Гуфтанист, овозхони ҷавон тоҷик Фарзонаи Хуршед моҳи феврали соли 2010 барои кӯмак дар фирори дӯстдоштааш Фаррух Рӯзиев аз толори додгоҳ, тибқи моддаи 36-и Кодекси ҷиноии Тоҷикистон ба ду соли зиндон маҳкум шуда буд.

Фирӯз БАРОТОВ, Шаҳлои ГУЛХОҶА, TojNews

Filed under: Хабар, ФАРЗОНАИ ХУРШЕД